Giaprobahan sa Commission on Elections (COMELEC) ang dugang nga adlaw sa pagrehistro sa mga botante gikan sa inisyal nga deadline nga Septyembre 30, karon gibalhin hangtod sa katapusan sa Oktubre.

Kini opisyal nga gipahibalo pagkahuman sa pagpasar sa House Bill 10261, usa ka gisugyot nga lakang, nga nagtinguha nga dugangan ang panahon sa pagrehistro sa mga botante og usa ka bulan.

Sa pahayag gikan sa Tigpamaba sa COMELEC nga si James Jimenez, nag-ingon nga ang “Extension gikan Oktubre 11 hangtod 30, Lunes-Biyernes, wala’y Sabado, gawas sa katapusang adlaw, Oktubre 30, 8 am hangtod 5 pm.”

Dugang kasayuran, giaprubahan usab sa COMELEC En Banc nga dugangan ang pagparehistro sa mga botante sa gawas sa nasud gikan Oktubre 1-14.

“Hinumdomi nga alang sa pagboto sa gawas sa nasud, ang pag-file sa mga COC dili isyu, sa ingon magsugod dayon ang pagpalawig,” ingon ni Jimenez.

Ang nasud karon aduna nay 61 milyones ka mga rehistradong botante, lakip ang 3,691,958 nga bag-ong nagparehistro alang sa 2022 nasyonal ug lokal nga eleksyon. Sa kasamtangan, labaw sa 18,000 ka mga posisyon ang gitaya sa mga botohanan sa sunod tuig. (PNA)